Psalms 119

Lenavolo At Leeme Silok

1Luvukat mo ik lok tinedi lorooro atdi kopmen tosoogong teren, la di rooro mumu asu Lenavolo at Leeme Silok. 2Luvukat mo ik lok tinedi di mumu asu lempapaase matmatkun at Leeme Silok la ding tonga res teren mi lebelen di axap. 3Dixo lok tempanga i bilinga, ketla dit pas mu asu leveloklok at Leeme Silok. 4Leeme Silok, nenu ura li vam levempapaase auru ram, kusu nema manang tonga res mu nunuan tino i. 5Naba lox avukat aleng mo do nenia a ruturun tim tebeng atmatkun leventetere avolo ram. 6Do nia anam doma aklen amisik ti mo levempapase ali ram, nia noxo ruuna ka lainmangan. 7Aba emi asu minu mi labalak i xasep, mo do nenia anaklen avukat leventaangas mokmokso ram. 8Aba ronga res mu axap leventetere avolo ram, kuren la nemen uta rexes kepe ia.

Lorongtonga Res Mu Lenavolo At Leeme Silok

9Tamdak aau naba lok lorooro ren kereva xusu na nemen manmanton? Neni na rooro mu mun levelinga ram. 10Nia a lolos kusu ana gugu taba u mi labalak axap, la una lok tooro ia xusu nia a noxo ronga xepe mo levempapaase ali ram. 11Ara xonom ka axap pam levelinga ram mi leveeve rak, kusu nenia a noxo lok taxakapmek tu. 12O Leeme Silok, leemi asu mun tu; una anasa ia mi leventetere avolo ram. 13Nenia anaba paase asu amisik mo leventaangas nenu uga raba nema min. 14A momo ri mumu asu levempapaase matmatkun taram, i ngan lara i momo mi langsangan lapnovos. 15A viila mumu levempapaase auru ram la aram doma mumu avukat levenanasa ram. 16A momo aleng at leventetere avolo ram, kuren la a noxo doma aie xepe ba levelinga ram.

Lomomo Keneng At Leventaangas Linga At Leeme Silok

17Leeme Silok, una lok lununuan tia, laradi gugu ram, kusu nia aba rooro, la abang tonga res at levelinga ram. 18Una valas luxatli rak kusu aba ven kibis levenanasa nunuan keneng at Lenavolo ram. 19A nemen ngan loose at na lavatkangka, la nemen gat uta lipe levempapaase ali ram basinge ia. 20Lorooro axap tarak, mo i ngaongao mu leventaangas taram at levenaleng amisik. 21U paase sok luvuttadi loklok aru, la lasaxaek ik lok mavana atnedi dit pas taba arulu mo levempapaase ali ram. 22Una sep pinak di kusu di noxo paase aksaksa ria la dinoxo paase kapmek bok tia, mila nenia a mumu asu lempapaase matmatkun taram. 23Keke i do luvuttadi amgomgo dina xis buru, la dina puse ngas ti sev amer ia; ketla nenia laradi gugu ram, abam doma mumu amisik leventetere avolo ram. 24Lempapaase matmatkun taram i so misigisigis, ni mun ik lok tooro ia xusu ana ruuna ka lodoxoma avukat.

Laradi I Lolos Kusu Na Mumu Asu Lenavolo At Leeme Silok

25Nia mo ak midi rinotno ro xeneng at laxakup; una lox aroo ia kerekngan levelinga ram. 26Aga tong asu axap lorooro rak, la uga ronga ia; una anasa ia mi leventetere avolo ram. 27Una lok tooro ia xusu ana xasep at levenanasa at levempapaase auru ram, kusu abam doma mumu mo leven gugu nunuan taram. 28Lorooro rak mo i umsu mi lainbulu, kuren la una lox alolos ia kerekngan levelinga ram. 29Una tupe ia xusu a noxo beles at leveloklok i lok kapmek; la una lox ase ia mi Lenavolo ram atla u balamu ia. 30Ara soxolik ka vam langas ti mumu asu levelinga ruturun taram; ara ronga avukat pam leventaangas linga ram. 31O Leeme Silok, am tebeng lolos lempapaase matmatkun taram; nemen uta ke xepe ia la limixin dina lox amangan ia. 32A lolos aleng kusu ana mumu asu mo levempapaase ali ram, mila uba suxa amu manga ia mi lodoxoma avukat.

Lisingising Ti Lok Ka Lakleken

33O Leeme Silok, una lox ase ia kusu ana xasep at leventetere avolo ram, la anabang tonga res teren at levenaleng axap. 34Una soxomus asu Lenavolo ram tia la abam tebeng atmatkun teren; la anang tonga res teren mi labalak axap. 35Una lam ia xusu ana mumu asu mo levempapaase ali ram, mila ik lox asuusu lomomo ria. 36Una lok labalak kusu ana mumu asu lempapaase matmatkun taram, la kopmen nia a noxo vara solo lapnovos silok mede xopok. 37Una lok luxatli rak kusu a noxo veneves at laxampanga gamasa la una lox anunuan lorooro rak kerekngan levelinga ram. 38Una lox epovo laxakaape ram tia, laradi gugu ram, i ngan uk lox epovo i rinedi ding tonga res taram. 39Una ru pepe mo lempapaase aksaksa, ua ik lox amarar ia; leventaangas taram i lox avukat. 40A vara rinotno i xusu ana mumu asu levempapaase auru ram; una lox amaxat lorooro rak mila loklok taram ik mokso.

Tanam Tebeng Atmatkun At Lenavolo At Leeme Silok

41Leeme Silok, una lox asuusu labalamu ram tia, la una lox arooro ia kerekngan laxakaape ram tia, 42kuren la aba epovo na vaase poorang levelinga at mo luvuttadi di lok kalise ia, mila nia a nuunu saga at levelinga ram. 43Nemen uta lok pes mo levelinga ruturun taram basinge ia, mila nia aga lok li lodomdoma voovo rak at leventaangas taram. 44Abang tonga res amisik at Lenavolo ram at levenaleng axap i tu melamgo. 45Aba nemen sepmus basinge levenmumuat, mila nia a mumu asu levempapaase auru ram. 46Aba paase asu levempapaase matmatkun taram ti lavaorong silok, la nia a noxo mangan. 47Nia a momo mi levempapaase ali ram, mila labalak i tu i. 48A lok ngangao aleng ap mo levempapaase ali ram la labalak i tu mun i, la abam doma mumu amisik mo leventetere avolo ram.

Laradi I Nuunu Ruturun At Lenavolo At Leeme Silok

49Leeme Silok, una doxoma mo levelinga ram tia, laradi gugu ram, mila i lox alolos ia xusu ana nuunu saga ram. 50Uga lox amenemen ia at laaleng aga nemen keneng at losongsongot, mila uga lox epovo laxakaape ram tia la uga lox arooro ia. 51Limixin loklok keexee dik lok kalise amisix ia, ketla nia axo vas basinge ba Lenavolo ram. 52O Leeme Silok, a doma mo leventaangas taram me gaxatnak, la im taba ia mi loklok amenemen. 53Dola nia a ven limixin kapmek di los polo Lenavolo ram, lebelemamao i suxuna lorooro rak. 54At lorooro rak at na lavatkangka, a vo lengkompixan mi leventetere avolo ram. 55Leeme Silok, am doma u at lengkanimin, la am doma mumu bok Lenavolo ram. 56Lomomo it pot tarak mumu mun levempapaase auru ram, la nia ang tonga res mu i.

Laradi I Raba Axap Lorooro Ren Ti Lenavolo At Leeme Silok

57O Leeme Silok, labalak i tu xusuk mun u; a xaape do anabang tonga res mu amisik levelinga ram. 58A sing u mi labalak axap do una lox asuusu lebelemumu ram tia, ngan ugara xaape vam min. 59Ara ila mumu vam lorooro rak, la ara ba gili lorooro rak kusu ana mumu asu levempapaase matmatkun taram. 60Aba lok soso mun la anoxok lok sila kusu ri mumu asu mo levempapaase ali ram. 61Keke i do limixin kapmek dinam kobot ia mi laxalinga xaxarang, a noxo ke xepe ba Lenavolo ram. 62At lengkanimin tubu a katu kaxat kusu ana tong avukat tu ri nom leventaangas mokmokso ram. 63Nenia lentangas atnedi limixin di gugu ru la atnedi bok di mumu asu levempapaase auru ram. 64O Leeme Silok, lavatbung menemen i umsu aleng mi labalamu lexen taram. Una anasa ia mi leventetere avolo ram.

Lenavolo At Leeme Silok I Nunuan Aleng

65O Leeme Silok, urak lok anarong pam ia, laradi gugu ram, kerekngan levelinga ram. 66Una anasa ia mi levendoxoma nunuan la lakleklen, mila nia a nuunu saga at levempapaase ali ram. 67Nia aga vas soogong, la uga sev asongor ia; ketla ana nga nia ang tonga res at levelinga ram. 68Nenu u umsu mi lununuan, la uk lox asuusu loklok anare ri limixin. Una anasa ia mi leventetere avolo ram. 69Limixin loklok aaru di paase xaxarang mumu ia, ketla mi labalak axap ang tonga res at levempapaase auru ram. 70Mo luvuttadi kopmen tevendoxoma nunuan atdi, ketla nia an tuuna ka lomomo boro at Lenavolo ram. 71Mo levesongsongot uga raba ia min ga lox avukat, kuren la abaklen avukat leventetere avolo ram. 72Mo levelinga nenu uga raba ia min, ni i lok nunuan aleng ti lempilas axap at na lavatbung menemen.

Lenavolo At Leeme Silok Ni Inmanton

73Uga rudum ia mi lukngam la uk lox alipe ia basinge laniu; um taba ia mi levendoxoma nunuan kusu ri lox ase at levempapaase ali ram. 74Nedi dik lok ngangao ram, dik lok momo do dina reven tarak; mila nia a nuunu saga at levelinga ram. 75O Leeme Silok, aklen i do leventaangas taram ik mokso aleng, la uk lox aleeng ia mila nenu u ruturun at laxakaape ram. 76Una lox asuusu mo labalamu lexen taram kusu na lox amenemen ia, kerekngan uga xaape vam min tia, laradi gugu ram. 77Una lox asuusu lebelemumu ram tia xusu lorooro rak naba nemen avukat mila an tuuna ka lomomo boro at Lenavolo ram. 78Naba lox avukat do una lox amangan nedi limixin loklok aaru, mila di lili laxalinga xaxarang mumu ia; ketla nenia, anabam doma mumu levempapaase auru ram. 79Naba lox avukat do nedi dik lok ngangao ram, dina vot pasa ia; nedi bok di xasep at lempapaase matmatkun taram. 80Naba lox avukat do labalak nang tonga res mu avukat leventetere avolo ram, kusu naba lox asepsu ia basinge lainmangan atdi mo dik lox asi ia.

Lisingising Ti Lox Asu Lara At Loxokoxo

81O Leeme Silok, lengkot tarak ira meleexot axap la a ngangais tu xusu una lox aroo ia. Nia a nuunu saga at levelinga ram. 82Luxatli rak ira molo nga ri reven pupuke ri levengkakaape ram. La ara lok, “Lingisa ba uba lok tooro ia?” 83Nenia a lok ngan mun labantamon tem dadas; ketla axo ke xepe ba leventetere avolo ram. 84Nenia laradi gugu ram, anaba ngais alika ba? Lingisa ba uba sev asongot nedi dik lox asongor ia? 85Limixin loklok aaru di ke xepe Lenavolo ram, dira lok pam lenngitngit tia. 86I epovo rinotno xusu mana mumu asu mo levempapaase ali ram; una lok tooro ia, mila limixin dik lox asongot gamasa mun ia la kopmen tavasuun teren. 87Ma lixilik di lok do, dina sep amer ia; ketla nia axo raba arulu ba levempapaase auru ram. 88Mumu labalamu lexen taram, una lok lempanga nunuan tia, kusu abang tonga res at levempapaase matmatkun taram.

Laradi I Nuunu At Lenavolo At Leeme Silok

89Leeme silok, levelinga ram nabak lok at levenaleng axap i tu melamgo, la mo levelinga i tu tuxuruxun kerekngan laxalibet. 90Nenu unaba ruturun amisik kantubu at lavaola axap mo dibap tavasu melemu; uga vaxaxis aulis na lavatkangka la mo it kis tuxuruxun kuren. 91Leventaangas taram mo i nemen amisik se at na levenaleng, mila lempanga axap i nemen maxopok at loklok tatao ram. 92Mo do Lenavolo gixo lox amomo ia, nia ro gira met pam mumu laxasongsongot tarak. 93A noxo ronga xepe levempapaase auru ram, mila mumu mun i na levelinga loklok tooro ram, nenu urak lok tatao lorooro rak basinge lanmet. 94Una lox asepsu ia mila nenia ataram; la nia ara lolos amisik kusu ana mumu asu levempapaase auru ram. 95Limixin kapmek mo di kuxut tangais ia xusu dina sev amer ia; ketla nenia abam doma mumu levempapaase matmatkun taram. 96Araklen ba i do lempanga axap noxo nemen abao, ketla mo levempapaase ali ram in manton axap.

Labalamu At Laradi Ri Levelinga At Leeme Silok

97Labalak i tu munLenavolo ram, la am doma mumu amisix i at levenaleng kangking la kanimin. 98Mo levempapaase ali ram, ik lok amisik keneng at lodoxoma rak, la i lox ia, a xasep nunuan aleng polo nedi lavamunepen tarak. 99Aklen aleng polo nedi axap luvuttadi loklok ase rak, mila am doma mumu amisik levempapaase matmatkun taram. 100Aklen aleng polo nedi loxongkulao mukun, mila ang tonga res at levempapaase auru ram. 101Aga lok tatao alabat lavatpas tarak basinge lempatpas ua ga xapmek, kusu aba ronga res mu levelinga ram. 102Axo ke xepe leventaangas taram, mila nenu axa uga anasa ia min. 103Levelinga ram i so misigisigis aleng, la i volo loso at ladan misiu. 104Lempapaase auru mun taram im taba ia mi levendoxoma nunuan; kuren la nia axo esuxun mi limixin sosolo arup.

Laxasep Boro At Lenavolo At Leeme Silok

105Levelinga ram i lok ngan lababao rim lam ia, la i lok ngan bok laxasep ti langas tarak. 106Anaba lox epovo laxakaape lolos tarak do, anaba mumu asu amisik mo leventaangas mokmokso ram. 107O Leeme Silok, levesongsongot tarak i silok aleng kapmek, una lok tatao nunuan lorooro rak, kerekngan levelinga ram. 108O Leeme Silok, una mulus ka lisingising emi asu rak, la una anasa ia mi leventaangas taram. 109Laniu i tu saparap amisix ia xusu na lok korop kepe lorooro rak, ketla nia axo ke xepe gamasa ba Lenavolo ram. 110Limixin kapmek di lili larapelixo ria, ketla nia axo ronga xepe lempapaase auru ram. 111Lempapaase matmatkun taram i lok ngan loxom pulus nunuan naba nemen amisik eburu minia, la i lox aumsu labalak mi lomomo. 112Leveeve axap tarak i tu mun pana at leventetere avolo ram, naba se at laaleng lorooro rak naba xap.

Mina Tu Tuxuruxun At Lenavolo At Leeme Silok

113Axo esuxun minedi dixo ruturun tinotno ru; ketla labalak i tu mun Lenavolo ram. 114Nenu Lentupe la Lurutu See Pe rak, a nuunu saga at levelinga ram. 115Nemi luvuttadi loklok kakapmek, uto nimi basinge ia, kusu nenia aba mumu asu levempapaase ali at ne Moroa rak. 116Una lox alolos ia kerekngan laxakaape ram, kusu nenia aba rooro; la nemen uta ke xepe ia xusu ana vubeles at laniu. 117Unam tebeng ia mi lukngam, kusu nia a noxo ekip tangarang mi lumumuat; la abam doma mumu amisik leventetere avolo ram. 118Uk sok tixirixes nedi luvuttadi di ronga xepe leventetere avolo ram; mo levendoxoma alipe kapmek atdi, ni lavanga gamasa. 119Nenu u ven limixin kapmek ngan laxanboobong, ketla labalak i tu lempapaase matmatkun taram. 120Nenia a dede aleng atla a marat taram, la a lingun aleng mumu leventaangas taram.

Lorongtonga Res At Lenavolo At Leeme Silok

121Ara lok pam lempanga ik mokso la i nunuan, kuren la nemen uta ke avolo ia ri lavamunepen tarak. 122Una xaape ria, laradi gugu ram do, unaba lok tooro ia, la nemen uta ke xepe luvuttadi loklok aaru dina lox asongor ia. 123Luxatli rak ira molo nga ri reven tangarang ti nom loklok tooro la kusu ri lox asepsu ia basinge di kerekngan ugara xaape vam min. 124Una reven tatao ia, laradi gugu ram, kusu naba epovo rinotno mi labalamu lexen taram, la una anasa ia mi leventetere avolo ram. 125Nenia laradi gugu ram; una lox axasep lodoxoma rak, kusu aba xasep at lempapaase matmatkun taram. 126Leeme Silok, limixin dirat los polo amisik pam Lenavolo ram; kuren la levenaleng ira vot pam, kusu una sep pepe di. 127Labalak i tu aleng levempapaase ali ram i volo lavavara ri leven gol, la mo leven gol i nunuan aleng. 128Kuren la ara mumu asu lempapaase auru ram; la ak sok sisixe leveloklok axap i lok kapmek.

Langaongao Kusu Ring Tonga Res At Lenavolo

129Lempapaase matmatkun taram i lok nunuan aleng, kuren la nia arang tonga res mu i mi labalak axap. 130Losoksoxomus at levelinga ram im taba ia mi laxasep, la im taba bok lakleklen avukat tinedi kopmen takleklen atdi. 131A mamao etitit mi langaongao rinotno ri levempapaase ali ram. 132Una repukus mu ia la una belemumu ia, kerekngan pam uk lox i rinedi axap di vavara aleng u. 133Unam lam aratao ia at lavatpas tarak, kerekngan levelinga ram; nemen uta ke xepe libilinga nak sak tup minia. 134Una rebeng asu ia basinge levenmumuat at luvuttadi xapmek dim taba ia min, kusu nenia anabang tonga res at levempapaase auru ram. 135Unak lok amisik eburu minia ngan loklok anarong tia, laradi gugu ram, la una anasa ia mi leventetere avolo ram. 136Lengkabili dan ing pengkos su aleng at lamarak, mila limixin dixong tonga res at Lenavolo ram.

Lenavolo At Leeme Silok Ik Mokso

137O Leeme Silok, loklok taram ik mokso aleng, la leventaangas bok taram ik mokso. 138La mo lempapaase matmatkun uga li i, ik mokso la i epovo rinotno do nema manat mas saga ren. 139Mo lebelemamao keneng tarak i lok ngan laxao, mila limixin munepen minia dik lox abulubun levelinga ram. 140Mo levengkakaape ram agara lok tong pen pam i, kuren la nenia laradi gugu ram, a vara aleng i. 141Nenia mun laradi gamasa la limixin di lele abulubun ia, ketla axo ke xepe ba levempapaase auru ram. 142Loklok taram naba nemen mokmokso amisik, la Lenavolo ram naba ruturun amisik. 143Levenmumuat mi lodoxoma saasaa mo ira ebosa mavana rak, ketla levempapaase ali ram ik lox amomo ia. 144Mo lempapaase matmatkun taram ik mokso aleng tino; una raba ia mi lodoxoma avukat kusu nia aba rooro.

Lisingising Ti Loklok Asepsu Basinge Laniu

145O Leeme Silok, nia a ro ke ram; una ronga res tarak kusu abang tonga res at leventetere avolo ram. 146A ro ke ram kusu una lox asepsu ia basinge laniu; la nia abam tebeng avarang at lempapaase matmatkun taram. 147A aus kaxat no mene maxantamak suubu la ang teng tu xusu una lok tooro ia; atla a nuunu saga at levelinga ram. 148A tuuang aan amisik, kusu ana i doxoma mu lengkakaape ram. 149O Leeme Silok, labalamu ram i nemen lexen; kuren la una ronga ia; una lok tatao lorooro rak kerekngan leventaangas taram. 150Nedi mo dim doma xapmek tia mo nga dit pas auret ia, la dik lok paxalom tinotno basinge Lenavolo ram. 151Ketla nenu Leeme Silok uk lok auret mun ia, la nom axap levempapaase ali ram i ruturun. 152Ga ruka xa i gano, aga lox ase boro at lempapaase matmatkun taram, ua nenu uga vaxaxis i la naba nemen lexen.

Lorotoro Ri Loklok Tooro

153Una ven mumu laxasongsongot tarak la una lox asepsu ia basinge i, mila xovisi toxonaleng go nia ara ke xepe vam Lenavolo ram. 154Una ru at lenep tarak la una lox asepmus ia; una lok tatao lorooro rak kerekngan lengkakaape ram. 155Nenu u noxo lox arooro limixin kapmek, mila dixo mumu asu leventetere avolo ram. 156O Leeme Silok, labalamu ram i silok aleng; una lok tatao lorooro rak kerekngan leventaangas taram. 157Buaang nedi lavamunepen dik lox asongor ia, ketla nia axo raba arulu ba lempapaase matmatkun taram. 158A ven tinedi limixin tongtonga viribang, la a bele mumuat mila dixo mumu asu levelinga ram. 159Leeme Silok. Pen ba ia, a vara aleng levempapaase auru ram; una lok tatao lorooro rak mila nenu laradi balamu. 160Levelinga axap taram i ruturun la nom axap leventaangas taram ik mokso la naba nemen amisik.

Lavavara Ri Mu Asu Lenavolo

161Luvuttadi amgomgo dik lox asongot parang ia, la kopmen tavasuun teren. Ketla leveeve rak it kat tava mu levelinga ram. 162Levengkakaape ram ik lox amomo ia, kerekngan laradi i ruuna laplus i silok aleng. 163Ak sok tixirixes laxaxarang la labalak i xapmek tin, ketla labalak i tu aleng Lenavolo ram. 164Keneng at leges aleng, a tong avukat tu i vanuti mumu leventaangas taram ik mokso. 165Nedi di vavara aleng Lenavolo ram, dinaba nemen matmatkun la kopmen ba tavanga naba lox angtang nedi kusu dinak sak saaban. 166O Leeme Silok, a ngangais ti loklox arooro ram, la a mumu asu levempapaase ali ram. 167Ang tonga res at lempapaase matmatkun taram, mila a vara aleng tinotno i. 168Ang tonga res at levempapaase auru ram la nom lempapaase matmatkun bok taram, atla ukleklen axap leveloklok tarak.

Lisingising Ti Loklok Tooro

169Leeme Silok, una ronga lanteng tarak saparav u ri loklok tooro. Una lox asuusu lodoxoma aklen taram tia kerekngan laxakaape ram. 170Una ronga res at lisingising tarak, la una lox asepsu ia basinge levesongsongot kerekngan lengkakaape ram tia. 171Ana emi asu amisik minu, mila nenu u anasa ia mi leventetere avolo ram. 172Abak pixan mumu levelinga ram, mila levempapaase ali ram ik mokso. 173Una gagas amisik ti lok tooro ia, mila nia a mumu asu levempapaase auru ram. 174O Leeme Silok, labalak ing teng aleng ti loklox arooro ram; ketla Lenavolo ram ik lox amomo ia. 175Una lok tatao lorooro rak kusu aba emi asu minu; la una ke mo leventaangas taram na su auru ia. 176Ara vas soronga nga ngan lisipsip i soronga. Una puse ria, laradi gugu ram, mila nia axok lox aie xepe levempapaase ali ram.